Akstursíþróttafólk Íslands 2025

Sigurbjörg Björgvinsdóttir - Spyrna

Sigurbjörg á að baki viðburðaríkt ár í spyrnu á árinu 2025.Hún var á ferð og flugi með keppnistæki sitt, Tweety, á milli Íslands og Svíþjóðar.

Í vor fór hún til Svíþjóðar með Tweety á stóra bílasýningu. Að sýningunni lokinni þá var bíllinn fluttur til Íslands aftur til að taka þátt í afmælissýningu Kvartmíluklúbbsins sem og hefja keppni á íslandsmótinu í spyrnu.

Sigurbjörg tók þátt í 6 keppnum sumarsins og stóð uppi sem íslandsmeistari í áttungsmílu í A/E flokki (7,50 sek.) eftir spennandi og jafna keppni.

Þá fór Sigurbjörg á miðju sumri aftur til Svíþjóðar og tók þátt í vikulangri keppni, Street Week Sweden 2025, sem haldin var í níunda sinn. Það er keppt á fimm brautum og ekið á milli þeirra á keppnistækinu. Hún keppti í True Street flokki og náði að ljúka keppni með góðum árangri.

Á árinu marg bætti hún tíma sinn á Tweety sem lofar góðu fyrir næstu ár.

Sigurbjörg er fyrirmyndar keppandi og er dugleg að kynna íþróttina með jákvæðum og uppbyggilegum hætti.

Helena Ósk Elvarsdóttir - Rallycross

Helena er ung og efnileg akstursíþróttakona sem hefur verið að keppa í Rallycrossi frá 15 ára aldri kláraði Unglingaflokki og færði sig svo í 1000 standard flokkinn. Helena hefur verið mikill fyrirmynd fyrir aðra í sportinu. Helena hefur verið dugleg að aðstoða aðra keppendur, bæði með að aðstoða að halda æfingar og koma þekkingu til þeirra sem eru að stíga sín fyrstu spor í sportinu. Helena tók þátt í öllum keppnum sumarsins og endaði 3 til Íslandsmeistara.

Linda Karlsdóttir - Nákvæmisakstur

Linda hefur verið tengd akstursíþróttum í mörg ár. Hún hefur keppt í rally, margsinnis sem aðstoðarökumaður en líka prófað að keyra. Hún hefur oft staðið á verðlaunapalli og varð meðal annars Íslandsmeistari aðstoðarökumanna 2024.

Auk þess hefur hún stutt dyggilega við þátttöku fjölskyldunnar í sportinu gegnum árin, þá bæði eiginmann sinn og krakkana sína. Nú í ár tók hún þátt í Íslandsmótinu í nákvæmnisakstri með elstu dóttur sína sér til aðstoðar. Þar tókst þeim mæðgum að landa öðru sæti til Íslandsmeistara eftir harða og spennandi keppni.

Vigdís Pála Þórólfsdóttir - Rally

Vigdís hefur sýnt ótrúlega elju, fagmennsku og ástríðu fyrir sportinu og er orðin ómissandi hluti af íslenska rallyheiminum, og er sem slík mikil fyrirmynd.

Vigdís byrjaði í rally sem aðstoðarökumaður Almars, bróður síns, í Haustrallinu 2022. Þau hafa keppt saman í 13 keppnum og lent 11 sinnum á verðlaunapalli. Vigdís varð Íslandsmeistari sem aðstoðarökumaður árið 2024 í flokki C. Sem aðstoðarökumaður stendur hún sig frábærlega –les nótur af nákvæmni, yfirvegun og alúð, og hefur verið lykillinn að frábærum árangri þeirra systkina.

En Vigdís er svo miklu meira en keppandi. Hún er hjartað og drifkrafturinn á bak við liðið þeirra systkina. Hún sér til þess að allir séu vel undirbúnir, græjar nesti fyrir allt liðið og hugsar um öll smáatriði – jafnvel með því að útbúa klósett í service-bílnum fyrir allar stelpurnar sem keppa. Hún veit að góð aðstaða og samheldni skiptir máli.

Vigdís leggur líka mikið af mörkum utan sérleiða. Hún hjálpar nýjum aðstoðarökumönnum að læra á tímabækur, deilir reynslu sinni og veitir þeim stuðning og sjálfstraust. Hún er virk í nefndum og ráðum innan AÍFS og tekur þátt í skipulagningu rallykeppna, þar sem hún leggur sitt af mörkum til að þróa og efla sportið fyrir alla.

Það sem gerir Vigdísi einstaka er ekki aðeins hæfileikinn hennar og dugnaðurinn, heldur líka hlýjan, gleðin og samfélagsandinn sem hún ber með sér. Hún er fyrirmynd, leiðtogi og sannur innblástur fyrir konur í akstursíþróttum og allt það fólk sem hefur hugrekki til að fylgja draumum sínum á fullum hraða.

Freydís Anna Jónsdóttir - Hringakstur

Freydís Anna hefur verið ein af því miður fáum konum sem hafa tekið þátt í hringaskturshópnum í sumar og er eina konan sem keppti í íslandsmeistaramótinu.

Hún stóð sig með prýði þar og var akstur jafnt sem framkoma, áhugi og áræðni algjörlega til fyrirmyndar og væri gaman ef aðrar konur myndu feta í hennar fótspor í hringaksturshópin.

Hrafnkell Rúnarsson - Drift

Hrafnkell eða Keli eins og hann er of kallaður er einbeittur, djarfur og ekki síst skemmtilegur keppandi sem hefur mikla ástríðu fyrir sportinu og er góð fyrirmynd fyrir nýliða og aldraða í Drifti.

Keli keyrði sitt fjórða ár í Opna Flokk þetta sumarið. Þar átti hann mörg krefjandi einvígi á móti fremstu og flottustu drift keppendum landsins en eftir þrjár æsispennandi keppnir náði hann að tryggja sér fyrsta sætið í Íslandsmeistara mótaröðinni á seinustu keppni ársins.

Eftir Íslandsmeistaramótaröðina setti hann stefnuna á Evrópu en þar tók hann þátt í þremur keppnum, ein þeirra í Póllandi á fremstu og flottustu mótaröð landsins (og Evrópu) svo helgina eftir keppir hann á alþjóðlegri keppni haldin af FIA, en hún heitir FIA Intercontinental drifting cup. Að lokum mun hann keppa í seinustu umferð mótaraðarinnar í Ungverjalandi. Við trúum ekki öðru en að hann standi sig vel úti og verði flottur fulltrúi Íslands á þessum stórkeppnum.

Bjarnþór Elíasson - Torfæra

Olsen Olsen – Lið úr stáli og sál

Það var ekki nóg að vera snillingur einn. Bjarnþór vissi að til að klífa hærri hæðir þurfti lið – fjölskyldu á hjólum. Hann og Gulli stofnuðu Olsen Offroad, lið sem ekki bara keppir – heldur berst eins og bræður og systur í einni vélrænni einingu.

Þeir komu með sérstakan anda inn í mótorsportið árið 2023 – blöndu af einlægni, kænsku og brjálæðislegu hugmyndaflugi. Þeir fóru að vekja athygli ekki bara fyrir hraðann – heldur líka stílinn, bílana og brjálæðið.

2023 – Brekkurnar kalla

Eftir nokkur ár í sandunum fóru brekkurnar að kalla. Torfæran, sú óútreiknanlega, skítuga og ófyrirsjánlega drottning íslensks mótorsports, togaði í sálina hans. Þar var ekkert leyfi fyrir mistök. Þar réð enginn nema náttúran.

Það sem gerðist þetta sumar var meira en bara keppni. Það var yfirlýsing. Bjarnþór mætti með nýjan bíl – af eigin hönnun, smíðaður frá grunni með blöndu af hugviti, verkfræði og gömlu, góðu brjálæði. En Bjarnþór, maður sem hafði sigrað sandinn, mætti brekkunum með bros á vör.

Nafnið Bjarnþór fór að vekja athygli, og innan skamms var það sagt með virðingu … eða ótta.

2024 – Undanfari goðsagnarinnar

Árið 2024 reyndist vera forleikurinn að því sem koma skyldi. Bjarnþór mætti með nýjan kraft, skýrari sýn og fullan tank af metnaði. Bjarnþór byrjaði sumarið af krafti og vann sinn fyrsta sigur í Bikarkeppni – tímamótaafrek á ferlinum sem margir höfðu séð fyrir sér, en nú var það orðið að veruleika. Keppnin, sem þekkt er fyrir að vera grimm, ófyrirsjáanleg og aðeins kláruð af hörðustu mönnum, varð sviðið þar sem hann steig fram og sýndi hvers hann var megnugur.

Síðar sama sumar sigraði hann á Blönduósi og sýndi þar að þetta var ekki bara flug – heldur flugtak. Keppni sem hefur velt mörgum og brotið fleiri. Þar var engin mistök leyfð, en Bjarnþór ók af öryggi og ákefð sem minnti á atvinnumann á sínum hápunkti. Og þegar aðrir sátu fastir – flaug hann.

2025 – Árið sem vélin varð að goðsögn

Þeir sem voru viðstaddir munu aldrei gleyma því. Sumarið 2025 – þegar Bjarnþór Elíasson og Olsen Olsen stigu inn í torfærukeppnir eins og þeir hefðu rífið sig út úr gamalli norrænni

hetjusögu. Bíllinn – hálf vél, hálft dýr – virtist ekki keyrður, heldur vakinn til lífsins með galdri. Hann ók ekki bara yfir brautina – hann breytti henni. Gerði torfæruna að sínu sviði.

Hann vann bæði Íslandsmótið og Bikarkeppnina, og það með stæl sem fólk talar enn um. Titlarnir voru ekki unnir með heppni, heldur nákvæmni, útsjónarsemi og óbilandi eldmóði.

Gamlir keppinautar sögðu að moldin hafi logað undir honum. Að hann hafi ekki bara ekið yfir brekkur, heldur skipað þeim að víkja.

Valur Jóhann Vífilsson - Spyrna

Valur Jóhann Vífilsson er fæddur 1956 og hefur verið félagi í Kvartmíluklúbbnum síðan 1980.

Hann var útnefndur heiðursfélagi Kvartmíluklúbbsins á 50 ára afmælishátið klúbbsins á árinu.

Valur var jafnframt sæmdur gullmerki AKÍS á ársþingi sambandsins í vor.

Valur er ávallt boðinn og búinn að taka þátt í félagsstarfinu og aðstoða þegar til hans er leitað og miðla af reynslu sinni og þekkingu. Hann er endalaus uppspretta skemmtilegra verka og var meðal annars fyrstur til að smíða og keppa á dragster á Íslandi.

Frá því að Valur hóf að keppa hefur hann sett mörg met og unnið marga titla.

Hann hefur reglulega verið Íslandsmeistari í spyrnu, fyrst árið 1981, og mjög reglulega síðan.

Á árinu 2025 varð Valur íslandsmeistari á dragster í OF flokki í spyrnu. Árið var einnig sannkallað metaár því Valur setti brautarmet í kvartmílu á Kvartmílubrautinni á tímanum 6,33 sek. Hann setti einnig brautarmet á spyrnubraut BA á Akureyri á tímanum 4,08 sek. Í OF flokki í sandspyrnu setti Valur íslandsmet á tímanum 2,96 sek. Þá náði hann að rjúfa 4 sek múrinn í áttungsmílu og ók á tímanum 3,94 sek. sem jafnframt er næst fljótasta áttungsmíluferð sem keyrð hefur verið hér á landi.Árangur Vals í spyrnu á árinu er einstakur.

Valur hefur ávallt verið til fyrirmyndar sem keppandi og það eru ekki margir akstursíþróttamenn á Íslandi sem geta státað af svona farsælum og löngum ferli.

Heimir Snær Jónsson - Rally

Heimir er 40 ára og hefur á sínum langa ferli aðallega keppt sem aðstoðarökumaður. Á keppnistímabilinu 2025 myndaði Heimir sterka áhöfn með ökumanninum Baldri Arnari, þar sem þeir kepptu á Subaru Impreza STI. Þeir fengu stig í þremur af fimm keppnum ársins; urðu tvisvar í öðru sæti og sigruðu í einni keppni. Árangurinn er sérstaklega góður þar sem síðustu tvær keppnirnar fóru fram í sekúnduslag við sterkustu og efnilegustu ökumenn landsins, ekki síst í því ljósi að þeir félagar hafa ekki keppt saman í nokkur ár. En með stöðugleika og einstakri samvinnu tryggðu þeir sér Íslandsmeistaratitilinn 2025, og það í annað sinn saman, en fyrri íslandsmeistaratitilinn kom árið 2019.

Auk þess að hafa verið virkur keppandi í íslenskum akstursíþróttum í yfir tuttugu ár, en Heimir tók fyrst þátt í keppni árið 2004, þá hefur hann einnig látið til sín taka í félagsstarfi akstursíþróttafólks. Gegndi hann meðal annars stöðu formanns Bifreiðaíþróttaklúbbs Reykjavíkur (BÍKR) um nokkurra ára skeið. Hann sameinar því reynslu og þekkingu á íþróttinni, bæði innan og utan sérleiða.

Heimir er þekktur meðal akstursíþróttafólks fyrir jákvæðni, samvinnu og gleði sem hann ber með sér í hverri keppni. Hann er maður liðsheildar og samvinnu, lyftir andanum í liðinu, en á sama tíma er hann keppnismaður með mikinn metnað og einbeitingu í hverju því sem hann tekur sér fyrir hendur. Hann ber virðingu fyrir keppinautum sínum, og trúir því að heiðarleg keppni skapi bestu útgáfuna af hverjum íþróttamanni og liðsfélaga.

Tilnefning Heimis sem Akstursíþróttamaður ársins 2025 er viðurkenning á samspili árangurs, reynslu, jákvæðni og íþróttaanda, eiginleikum sem gera hann að verðugum fulltrúa akstursíþrótta á Íslandi.

Hergill Henning Kristinsson - Nákvæmisakstur.

Hergill er 17 ára gamall Hafnfirðingur og kemur úr mikilli mótorsport fjölskyldu. Hann hefur verið að keppa síðan hann var 14 ára gamall og var að ljúka sínu þriðja ári í rallycrossi, en einnig hefur hann keppti bæði sem ökumaður og sem aðstoðarökumaður í rally og E-rally (nákvæmnisakstri) síðastliðin 3 ár. Þess má geta Hergill er yngsti keppandi í sögu rally á Íslandi og var sá fyrsti til að fara með æfingarakstur í rallykeppni .

Keppnistímabilið var mjög annasamt hjá Hergli. Hann tók þátt í FIA E-Rally í júní sem var hluti af Heimsmeistaramótinu. Þar var hann ökumaður með Adam Mána Valdimarson sem aðstoðarökumann. Þeir stóðu sig best íslenskra áhafna og unnu því Íslandsmeistaratitil þar.

Hergill keppti í öllum keppnum ársins í unglingaflokki í rallycrossi þar sem keppnin er hvað hörðust, en flestir voru unglingarnir 23 í einni keppninni í sumar. Með góðum akstri landaði hann Íslandmeistaratitli í lokamóti ársins með örfáum stigum í loka riðlinum, eftir æsispennandi keppni.

Hann tók þátt í Rednek bikarmótinu í rallycrossi sem er 2 daga mót. Þar landaði hann Bikarmeistaratitli eftir harða keppni.

Þá keppti Hergill einnig í Íslandsmótinu í rally og var þar sem aðstoðarökumaður hjá bróður sínum Björgólfi Bersa, og í lokakeppni ársins tryggðu þeir sér Íslandmeistaratitil í Non turbo flokki.

Þess má geta að Hergill tók einnig þátt í Íslandsmeistaramótinu í snowcrossi s.l. vetur. Tók hann þátt í fjórum keppnum og var þrisvar sinnum á verðlaunapalli. Þá tók hann einnig þátt í einni keppni í motocrossi á árinu.

Samtals keppti hann í 17 keppnum í mótorsporti árið 2025, í 5 mismunandi greinum.

Árangur Hergils árið 2025:

• Íslandsmeistari í unglingaflokki í rallycrossi

• Íslandsmeistari Non- Turbo Rally

• Íslandsmeistari E-rally

• Bikarmeistari unglingaflokki Rallycrossi

Hergill er magnaður ökumaður og keppandi, ávalt kurteis og prúður þrátt fyrir að vera mikill keppnismaður. Alger fyrirmyndar keppandi hér á ferð.

Valdimar Kristinn Árnason - Rallycross

Valdimar er íslandsmeistari í unglingaflokki 2024 og var nú í sumar að keyra í 1000 standard, þar sem hann varð íslandsmeistari og bikarmeistari. þetta hefur hann verið að gera á sama bíl. Valdimar hefur verið í topp baráttunni í allt sumar og hefur verið sífelt að bæta sig sem ökumaður.

Ómar Örn Hlynsson - Hringakstur

Ómar hefur tekið virkan þátt í öllum keppnum sumars og flestum æfingum.

Þar hefur hann verið fremstur í flokki unglinga varðandi framferði, ástundundun og metnað.

Hann tók þátt í öllum keppnum sumars og skaraði frammúr ekki bara á meðal unglinga heldur gaf eldri og reyndari keppendum ekkert eftir.

Upp úr þessari vinnusemi og áræðni þá stendur hann uppi sem íslandmeistari unglinga árið 2025 í Formula1000. Þar sem hann sigraði allar þrjár keppnir. En ekki hefur verið unglingahópur í þessum flokk áður.

Vernharður Ravnaas - Gokart

Vernharður hefur tekið keppt í Gokart á erlendri grundu undanfarin ár.

Gokart tímabilið 2025 hófst í apríl og byrjaði Vernharður af miklum krafti.

Í fyrstu keppni ársins í Noregi byrjaði hann á ráspól, en vegna mótorvandamála í 2. sæti eftir spennandi lokabardaga.

Alls tók hann þátt í 8 keppnum á árinu og náð 2-7 sæti í þeim keppnum sem að hann hefur náð að klára og oft á verðlaunapalli

Hann hefur sýnt mikinn stöðugleika og þroska í akstri og hefur vakið athygli fyrir aksturslag sitt – þrátt fyrir að vera yngri en margir keppinauta sinna.

Stærsta afrek ársins var þegar Venni náði 3. sæti í Norðurlandakeppninni IAME Nordic Cup í flokknum X30 Junior í júlí. Keppnin fór fram í Noregi og er ein sterkasta gokartkeppni

Norðurlandanna. Vernharður var eini Íslendingurinn sem tók þátt og tryggði Íslandi verðlaunasæti gegn reyndum keppendum sem margir hverjir keppa reglulega á alþjóðlegum vettvangi.

Vernharður hefur skýr markmið og mikið keppnisskap sem að honum hefur tekist að beita á jákvæðan hátt til árangurs.